സുഭിക്ഷ ജീവിതം
------------------------
പുലരാനൊരുങ്ങുന്ന
ഇരുളൊഴിച്ചൊരു കട്ടൻ ചായ..

തലേന്നത്തെ നിലാവുറയൊഴിച്ചതുംകൂട്ടി-
യുപ്പിട്ടു മോന്താനിത്തിരി പഴംചോറ്‌.

കടിച്ചാപ്പർച്ചിട്ടീച്ചറെ
പല്ലിലൊട്ടിച്ചൊട്ടിച്ചലിയിച്ചതിൽപിന്നെ
തിക്കും തിരക്കും മുക്കി വിളമ്പി
വാരിക്കുടിച്ചൊരുച്ചക്കഞ്ഞി..

ജനഗണമനയെന്നു നിറയെപ്പാലൊഴിച്ചു
ണിം ണിം ണിം നീട്ടിയടിച്ചൊരു നാലുമണിച്ചായ..

നമശ്ശിവായയെന്നും
നമുക്കു കണ്ടുപിടിക്കാമെന്നും
ഉറക്കം മെഴുക്കുപുരട്ടിക്കൂട്ടിയൊരത്താഴം

തിരിച്ചു കിട്ടാൻ ഞെരുക്കമോർമ്മയിൽ
രുചിപെരുക്കുന്ന സുഭിക്ഷ ജീവിതം..