ഭാഷാന്തരം
-----------------
മനസ്സു കടിച്ചു പിടിച്ചു നീയും
മൗനം ചവച്ചരച്ചു ഞാനും
പരസ്പരം കണ്ടുപിടിക്കുന്നത്‌
ഒരു പുതിയ ഭാഷയാണ്..
‌
കൂട്ടാനത്ര നന്നായില്ലല്ലേന്ന്
എന്നെക്കൂട്ടാത്തതെന്തേന്നു
അസ്സലായിരിക്കുന്നുവെന്ന്
അതെന്റെ നിതാന്ത ദു:ഖമെന്ന്
ഇന്നലെയും ഇവിടെ മഴപെയ്തുവെന്ന്
ഇന്നലെകളൊലിച്ചു പോയില്ലേയെന്ന്
അകത്തത്ര ചൂടില്ലെന്ന്
അകത്തെച്ചൂടൊരിക്കലുമാറില്ലെന്ന്
ഇനിയെപ്പോഴാണു ബസ്സെന്ന്
ഇനിപ്പറഞ്ഞിട്ടെന്തെന്ന്
ഒരോട്ടോ പിടിക്കാമെന്ന്
ഓടിയൊളിക്കലല്ലേ ശീലമെന്ന്
മുറ്റത്തെപ്പൂക്കളെന്തു ചന്തമെന്ന്
മനസ്സെവിടെയൊളിച്ചു വയ്ക്കുമെന്ന്
ഇനിയെന്നു വരുമെന്ന്
ഇത്രകാലമെവിടെയായിരുന്നതെന്ന്
ഇടയ്ക്കെപ്പോഴെങ്കിലുമാട്ടെയെന്ന്
ഇടനെഞ്ചിലൊരു വിങ്ങലെന്ന്.....

വിവർത്തനത്തിനു വഴി തിരഞ്ഞ്‌
വെറും വാക്കുകൾ വഴുതി നീളവേ
നമുക്കിടയ്ക്കൊരു നിശബ്ദ ഭാഷയിൽ
നിറഞ്ഞു പെയ്യുന്നു നേരിൻ പദാവലി