അലിംഗ പ'ദാ'ക
------------------------
സ്വാതന്ത്ര്യം എന്നൊരു പദമുണ്ട്‌
ആഗസ്റ്റുപതിനഞ്ചെന്ന്
അർത്ഥമെഴുതിപ്പഠിച്ചത്‌
ഉയർത്തിക്കെട്ടിയുച്ചരിച്ച ശേഷം
വീട്ടിലേക്കെടുക്കാൻ വിട്ടു പോയത്‌
സ്വന്തമെന്നവനും
സ്വപ്നമെന്നവളും
സ്വരപ്പെടുത്തിയിരുന്നത്‌
‌വല്ലാതെ വളഞ്ഞതെന്നവളും
വല്ലാതെ തെളിഞ്ഞതെന്നവനും
ലിപികെളെക്കുറ്റം പറഞ്ഞത്‌
‌ഉറഞ്ഞു പോയ നിഘണ്ടുവിൽ
തിരഞ്ഞു വശം കെട്ടത്‌
നിന്നെക്കെട്ടിയിട്ടാൽ കിട്ടുന്ന
ഒറ്റവാക്കെന്നു ഞാനും
നിന്റെ കെട്ടഴിച്ചാൽ കിട്ടുന്ന
സമസ്ത പദമെന്നവളും
പുല്ലിംഗമെന്നവനും
സ്ത്രീലിംഗമെന്നവളും
പരസ്പരം പഴി പറയുന്നത്
പറഞ്ഞു പറഞ്ഞിടയിൽ
അലിംഗമാർന്നലിഞ്ഞു പോയത്‌