ശൂന്യം
-------------------------------
ശൂന്യം
ഒരു പെരുമ്പൊരുളിന്റെ പേരാണ്‌..
ആദേശം ചെയ്യുന്നതിന്റെ അളവെടുക്കാൻ
ആർക്കിമിഡീസിനെ കാത്തിരിപ്പാണത്‌
നിറഞ്ഞു കിടക്കുന്ന നിന്നിൽ
നിശ്ശൂന്യമെന്നെ നിറയ്ക്കുക..
ആദേശംചെയ്തൊഴുകുന്നതെടുത്ത്‌
ആടിക്കളിക്കുന്ന ത്രാസ്സിന്റെ
ആത്മാവിലൊന്നു തൂക്കി നോക്കുക.
തുടിക്കുന്ന ഒരു ഹൃദയമെന്ന്
അളവു കുറിച്ചു വയ്ക്കുക.
നഷ്ടഭാരക്കണക്കൊരു
പരിരംഭണം കൊണ്ട്‌
ദു:ഖഭാരമെന്നളന്നെടുക്കുക
ഒരുവശത്തധികഭാരമൊരു ഹൃദയം
മറുവശത്തതേ ഭാരമാർന്നു ശൂന്യം
ഹൃദയശൂന്യം= ശൂന്യഹൃദയം!!
കുറ്റങ്ങളുടെ കഴുമരം നിറച്ചിരിക്കുന്ന
ഒരു കുളിത്തൊട്ടിയിൽ നിന്ന്
യുറേക്കാ യുറേക്കാ എന്ന് ഇറങ്ങിയോടുക
തെരുവു കാത്തിരിക്കുന്നു
ഉടലിലുണ്ടാവരുതൊരു നൂലു പോലും
യുറേക്കാ...